Illo Hödoga Tartoh

Setonius

Tuuvoori olliva nimäq Tarttoh jo mitmõndat kõrda. Illo oll tõõnõkõrd peris poolõldõ herräsmehe plaani. Kaapküpär pääh ni lips ette köüdet. Hödokõnõ oll inämbält karpaku muudu, õks kartus pääh.

# Illo lännü Tartto turu pääle. Kaenu edimält kaupa a sõs oll timäl tulnu jälki himo viguret tetäq. Kaie, üts turupaaba mööse munnõ. Illo astsõ ligi, küsse hinda ni et kas nuuq munaq kah värskeq ommava.Paaba kinnit, et ommava jah! Illo ütel sõs et timä taht perrä kaiaq. Võtt üte muna, lei lahki... Kaeq imeht! Muna seeh oll vahtsõnõ 10-ruublinõ kuldraha! Illo „pand“ raha karmanehe, lei tõõsõ muna lahki... Jälki 10-ruublinõ! Tuu pääle heit paaba suurõräti üle karssinakõsõ ni ütel, et timä ei müüq mitte ku üts muna inämp.

   Paaba võtt karssina ni pagõsi turu päält kohegi Imäjii viirde võsso. Sääl timä sõs kokse kõik nuuq munakõsõq ärq...Olõs näide seeh üttegi kopigukõistki.

   Tuu pääle lännü paaba Politseihe. Sääl jo tiidsevä naid vigurimiihhi. Illo kutsuti vällä, sõimadi nägo täüs ni üteldi, et vaesit inemiisi masaiq sedäviisi ullitada. Mis timäga õks muud tetäq.

# Vaest tuulsamal aol oll Hödol sääntene lugu. Tiiäiq maq, oll nüüd timä pungahiilja vai ei. A nii om kõnõldu.

   Politseiq krabasi Hödo kinniq ni veiväq Priistavi ette. Kiäki oll kaibanu, et Hödo varast timäl karmanest 25 ruublit. Tuu oll jo sõs väegä suur raha.

   Priistavi iih heit Hödo hinnäst põlvildõ, silit korgõ herrä jalasiiri ni kinnit jumalakiili, et timä joht olõiq tuud rahha võtnu. A Priistav käsk Hödo läbi otsi. Hödo karmanest löüti õnnõ mõni kop`kas ni tä lasti tulõma.

   Kõnõldas, et õdagu oll Hödolõ antu üts kuväär Priistavi käest. Sääl oll olnu 25 ruublit ni kiräkõnõ hulga krõbõhõsi sõnnuga Hödo kotsilõ. Kõnõldas, et ku Hödo oll Priistavi iih põlvildõ olnu ni siiri siltanu, oll timä sokutanu tuu 25-ruublitsõ Priistaviherräle kallosse sisse. 

Tagasi Setoniusõ mano