XIV Seto Kongress Verska kultuurimajah 9. oktoobril 2024
10.00-10.20 Seto hümn
Ülembsootska tervtüse’
Riigi valtsusõ tervtüse’
Kongressi rakendaminõ:
- juhatajidõ kinnitäminõ
- üleskirotaja kinnitäminõ
- inemisi ja helüde üleslugõjidõ kinnitäminõ
- kodokõrra tutvasttegeminõ
- pääväkõrra tutvasttegemine
- inemisi üleslugõjidõ aruandminõ
10.20 – 10.30 Vabarna Jane ja Järvelilli Rein – Seto Kongressi Vanõmbidõ Kogo (SKVK) päävanõmbidõ ettekandõ’ SKVK tüüst kongressevahelidsõl aol.
10.30-11.20 I TEEMA: Keele tähtsüs Seto kultuurih.
Ettekandõ’:
- Valgu Meel – seto kiil ja perimusoppus Setomaa kuulõh ja latsiaiduh.
- Raudoja Ahto – Seto keele arenguplaani täütmisest 2022-2024.
- Järvelilli Rein – Seto kiil ku seto rahva ja kultuuri alus ja põliskiili aastakümme. Otsusõ eelnõu.
11.20-11.30 Vaheaig
11.40-12.30 II TEEMA: Setomaa valla ni rahva majanduslik ja julgõolõgu olukõrd.
Ettekandõ’:
- Leima Aarne – Seto Kuningriigipäiv ku setodõlõ huuandja ja välläkutsõ’ tulõvikuh.
- Taro Igor – Setomaa toetusrühma puult kaetuna olukõrd ni arengu’ Setomaal.
- Kudre Raul, Timmo Margus – Muutusõ’ ja välläkutsõ’ Setomaal 2021 – 2027. Otsusõ eelnõu.
12.30-13.30 Lõunasüük
13.30-14.30 III TEEMA: Seto rahvas, Setomaa, Seto Kongress-kuis edesi?
Ettekandõ’:
- Hõrna Aare – Hoiami Petserimaa meeleh ja eloh. Otsusõ eelnõu.
- Järvelilli Rein – Seto Kongressi tulõvik. Otsusõ eelnõu.
12.30-15.00 SKVK kandidaatõ ülessäädminõ. 15.00 Muudatusettepanõkitõ üleandmisõ tähtaig.
14.30-15.45 Seto nuuri ni seto kogukondi tegemise’. Küläliisi sõnavõtu’.
- Grünbergi Maria – kiil, kultuur seto nuuri eloh
- Tarrose Triinu – Liis, Salmi Päikeriin – Seto kultuuri köütmine korgõh koolih opmisõl.
- Operi Rain – Seto kultuur ku väreht maailma – Euruupa Kultuuripääliin 2024 näütel.
- Malõhi Heli – Viljandimaa seto’.
- Sikka Maria ja Veesaare Anne – Valgamaa seto’.
- Hartmani Piret – Regionaalpoliitilise vaatõ’ piiriviirse elo kõrraldusõst.
SKVK kandidaatõ tutvasttegeminõ.
15.45-16.00 Vaheaig. Valiminõ.
16.00-16.30 Otsussidõ ja Seto Kongressi memorandumi ülekaeminõ, hääletaminõ.
16.30 SKVK Valimistõ tulõmuisi tiidäandminõ, kinnitäminõ.
16.45 -17.00 Päävä kokkovõtminõ, päävanõmba sõnavõtt.
Iloõtak
Otsustõ eelnõu’
Hoiami Petserimaa meeleh ja eloh
OTSUSÕ EELNÕU (26.09.2024 redaktsioon)
Verskah 9. oktoobril 2024
Hoiami Petserimaa meeleh ja eloh
Eesti umavaltsusõ luumisõ aigu 1917. aastagal püürdü’ Petseri liina ja valdu voliniku’ aamõtliku kiräga Eesti Kubermangu Maakogo poolõ, õt näide maa lähembäh tulõvikuh saasi’ Eestimaa külge liidõtus.
1918. aastaga 21. novembril esitedi Setomaa eesti seltskunnategeläisi nimel Eesti Demokraatilisõ Vabariigi Ajutisõlõ Valtsusõlõ ja pääministrilõ ettepanõk nimetädä’ valtsusõ esindäja Setomaalõ ni astu’ Setomaa Eestimaa külge liitmisõst kimmit sammõ. 22. novembril 1918 määräti Eesti Vabariigi Ajutisõ Valtsusõ Petserimaa komissarist Boriss Ustav. Petserimaa-Setomaa rahva juhi’ võti’ algusõst pääle osa Eesti umavaltsusõ ja Eesti riigi luumisõst sooviga, õt saia’ osast Eestimaast ja Eesti Vabariigist.
Setomaa-Petserimaa esindäjidõst mitte olõnõvalt lövvä-s Petserimaa-Setomaa nimetämist Eesti Eissaisvusõ välläkuultamisõ kiräh.
Tarto rahulepinguga saiõ Petserimaa-Setomaa Eesti Vabariigi kõkõ hummogupuulsõmbast maakunnast.
1940.–1944. aastaga suurõ’ pöörähüse’ ja suur sõda tõie’ Petserimaalõ-Setomaalõ vahtsõ’ kannahtusõ’, Vinne ütepoolinõ kammandaminõ sääd´ Setomaa keskpaika traataia, mia järest inämbä om muutnu põlistõ petserimaalastõ ello. Viimätsidõ aastakidõ taud ni suur sõda, suurõ’ kitsõndusõ’ Eesti-Vinne kontrolljoonõst ülekäumisõl omma’ tennü’ viil rasõhõmbast perridõ läbikäumisõ, Petserimaal olõvidõ kododõ ja umatsidõ kalmõ kõrrahhoitmisõ.
Seto Kongress ütles:
1. Seto Kongress, Seto Kongressi Vanõmbidõ Kogo omma’ kuuhtüüh Eesti Vabariigi valtsusõga arotanu’, otśnu’ ni kõrraldanu’ sammõ olukõrra leevendämisõst.
2. Seto Kongress tunnustas Vabariigi Valtsusõ seenitsit tegevüisi Setomaa probleeme lahendamisõl ja arõnguvõimaluisi luumisõl.
3. Seto Kongress pidä tarvilikust, õt Vabariigi Valtsus olõs śooh väiga keerolidsõh aoh ja olukõrrah pidevält tiidlik Setomaa ja Petserimaa olukõrrast ja kavandasi’ ni teesi’ kõiki tegevüisi piirkunnah pikäaolidsõlt.
4. Kõiki tegevüisi, mia’ mõotasõ’ ello aoluulidsõl Setomaal-Petserimaal, piat alostusõst pääle kokko lepmä Setomaa esindäjidõga. Edimätseh järekõrrah kõkkõ tuud, mia pututas kontrolljoonõst ülekäumist, Eesti passõ välläandmist ni noidõga üle piiri käumist.
5. Seto Kongressi Vanõmbidõ Kogol üteh Petserimaalt peri setodõ ja tõisi põlisrahvidõga Seto Kongressi vahelidsõl aol hoita’ tiidmist Petserimaa olukõrrast, anda’ tuust tiidä’ nii Eestih ku välähpuul Eestit.
6. Seto Kongressi Vanõmbidõ Kogol kõrraldada’ Eesti poolõ Setomaal ja seto kogokundõh Eestih, eriti nuuri siäh Petserimaa tundmist, tiidmist ja meelehpidämist läbi näütüisi, koolioppuisi, kirotamisi.
Setomaal elo hoitmisõst ja piiriviirse ala arõndamisõst
OTSUSÕ EELNÕU (26.09.2024 redaktsioon)
XIV Seto Kongress
OTSUS Verskah 9. oktoobril 2024
Setomaal elo hoitmisõst ja piiriviirse ala arõndamisõst
Eesti Vabariiki jäänü setodõ põlidsõl asualal om Eesti Vabariigi Valtsusõ määrusõga nr 125 10.07.2017 moodustõt Setomaa vald. Setomaa vallah, mia om ütelisi ka Euroopa Liidu piiriala, om täütä’ tähtsä missioon – alal hoita’ ja järgmätsilõ põlvilõ edesi anda’ umal põlidsõl asualal traditsioonilidsõ’ eloviisi’ ni tiidmisõ’, hoita’ ja edendädä’ seto kiilt, kultuuri, luudus- ja elokeskkunda.
Muutunu om olulidsõlt elo- ja julgõolõkiolukõrd Vinne kõrval, koh väiga tähtsä om Eesti Vabariigi piirialal elänikõ alalhoitminõ ni erinevidõ riiklikõ ja kotusõpäälsidõ teenussidõ tagaminõ. Tartu Ülikool RAKE 2024 märts „Kagu-Eesti piiriala sotsiaalmajandusliku olukorra, siseturvalisuse, piirijulgeoleku ja kogukonna uuring“
Arvõstadõh iihpuul üteldüt, uuringuh soovitõtut, tegutsõdõh Setomaa ja seto rahva esindüskogona ni vastutadõh seto leelo ku UNESCO vaimsõ kultuuriperändi nimekirja kannõt kultuuritraditsiooni ja seto rahva alalõjäämisõ iist.
Seto Kongress otsustas:
1. Seto organisatsioonidõl ja Setomaa vallal jakada’ kuuhtüüd ja võimaluisi löüdmist Eesti Vabariigi valtsusõga, õt suurõndada’ regionaalsidõ programmõ (Setomaa kultuuri ja arõnguprogramm) mahtu, õt tagada’ ettevõtlusõ arõng ja kultuuri alalhoituminõ.
2. Setomaa vallal jakada’ kuuhtüüd Haridus-ja Tiidüsministeeriumiga, õt piirialal olõs tagatu kultuuripiirkunnalõ sobiv haridusmudel ja tagatu tuu rahastaminõ.
Seto kiil ku seto rahva ja kultuuri alus ja põliskiili aastakümme
OTSUSÕ EELNÕU (26.09.2024 redaktsioon)
Verskah 9. oktoobril 2024
Seto kiil ku seto rahva ja kultuuri alus ja põliskiili aastakümme
Tunnustadõh, õt seto kiil om Eesti ja Vinnemaa väikoarvulinõ põliskiil, mia om välläkuulmisõ ohoh;
Saiõh arvu, õt seto kiilt saa-i alal hoita’ õnnõ keelekogokunna pingutuisiga, a’ om vaja tukõ riiklikust keelepoliitikast ja säädüsruumist;
Ar’ märkeh, õt seto keele prestiižile ja alalhoitmisõlõ ütest suurõmbast ohost om riigi puult seto keele mitte tähele pandminõ ja mitte tuństaminõ;
Näteh, õt om rassõ õigõt keelepoliitikat tetä’, tiidüst tetä’, plaanõ pitä’, ku’ olõ-i tiidmist õigõst keelestatistikast, ku seto keele kõnõlõja’ olõ-i üle loet ja kirja pant;
Ar’ märkeh, õt rahvusvahelidsõ põliskiili aastakümne (2022–2032) üts päämiisi mõttit om anda’ põliskeele kõnõlõjalõ ütehkõnõlõmisõ õigus riigi puult keeleasju arotamisõl ni otsustamisõl;
Ar’ märkeh, õt rahvusvahelidsõ põliskiili aastakümne (2022–2032) üleilmalidsõ tegevüsplaani perrä piat Eesti riik vasta võtma uma riikliku põliskiili alalhoitmisõ tegevüskava,
Seto Kongress OTSUSTAS:
- Vabariigi Valtsusõl tulõ kipõlt kokko panda’ ja vasta võtta’ Eesti põliskiili alalhoitmisõ tegevüskava.
- Tulõnõvalt keelesäädüse vällätüütämisõ kavatsusõst tulõ vahtsõh riigi keelesäädüseh anda’ seto keelele Eesti põliskeele staatus.
- Seto kiil tulõ panda’ Rahvastikuregistri keelevaliku nimekirja.
- Kõigi Eesti põliskiili pututavidõ otsustõ tegemisõ mano tulõ kutsu’ Seto Kongressi Vanõmbidõ Kogo.
Seto Kongressi ümbrekõrraldaminõ
OTSUSÕ EELNÕU (03.10.2024 redaktsioon)
Verskah 9. oktoobril 2024
Seto Kongressi ümbrekõrraldaminõ
Saiõh arvu, õt Seto Kongressi tähendüst om vaja nõsta’;
Näteh, õt seto rahval om ao joosul tekkünü mitu esindüskoko ni tark om nuu’ jõu’ ütte köütä’,
Seto Kongress OTSUSTAS:
- Muuta’ Seto Kongress katõkambrilitsõst.
- Üte kambri moodustas Seto Kuningriigi Kroonikogo ja edespite kutstas tuud Seto Kongressi Kroonikogost.
- Tõõsõ kambri moodustas Seto Kongressi senat, koh om 100 senaatorit.
- Senat valitas seto rahva puult setodõ nimekirä alusõl. Nimekiri jaotõdas valimiskogodõst Setomaa nulkõ ni elokotsidõ perrä. Õga valimiskogo saa senaatori’ valli’ vastavalt tuu valimiskogo inemistõ arvulõ.
- Seto Kongressi kambri’ pidävä’ kuuholõkit ütitsõlt.
- Seto Kongress vali uma juhtorganist Seto Kongressi Vanõmbidõ Kogo.
- Seto Kongressi haldusorganina moodustadas Eesti riigi säädüste perrä Sihtasutus Seto Kongress.
- Śoo otsusõ kõiki punktõ vii Seto Kongressi tahtõl ello Seto Kongressi Vanõmbidõ Kogo.
- Kutsumi üles seto rahvast hinnäst setona kirja pandma.